Róleg menningarnótt

Eitthvað er talað um mikla ölvun og slagsmál í miðborginni í nótt og það er sjálfsagt rétt en hér á Kárastígnum var að minnsta kosti afskaplega rólegt öfugt við undanfarin ár; ég vakti eitthvað fram eftir nóttu og varð ekki í eitt einasta skipti vör við læti fyrir utan, ekki einu sinni að fólk væri að ganga um. Ég ætla ekki að segja að ég hafi ekki getað sofið síðustu menningarnætur fyrir látum vegna þess að ég sef allt slíkt auðveldlega af mér en þetta var gjörólíkt.

Það var borðað vel af kjötsúpunni í gær en eitthvað er þó eftir af tíu lítrunum. Ég nennti ekkert í bæinn í gærkvöldi; sat bara í sófanum og horfði á flugeldasýninguna út um stofugluggann. Boltastelpan er búin að vera hjá mér og gista margar undanfarnar menningarnætur en núna ákvað hún að fara á flugeldasýninguna með Svövu frænku sinni og gista svo hjá henni.

Ég er aðeins að byrja að taka til í skápum og skúffum og undirbúa flutningana, sem reyndar verða ekki fyrr en eftir tvo mánuði. En það er allt í lagi að byrja að fara í gegnum dótið. Í þetta skipti ætla ég að reyna að henda sem mestu eða losa mig við það ...