Ég grillaði lambakótelettur kryddaðar með sítrónu, timjani og kummini í kvöld og við borðuðum þær með salati, brauði og hummus. Ljómandi gott en ég ætla nú ekki að koma með uppskrift að þeim núna, ég er búin að vera með svo svipaðar uppskriftir að undanförnu. Aftur á móti er hér uppskrift að öðru tagi - ég eldaði þetta í gærkvöldi bæði sem kvöldmat handa mér og nesti handa efnafræðistúdentinum, sem var að fara að lesa úti í skóla. Öll eldamennskan tók ekki nema korter og svo setti hann sinn hluta í box, greip með sér prjóna (á þessum bæ er kínverskættaður matur yfirleitt borðaður með prjónum) og hélt af stað en ég hreiðraði um mig í sófanum með tölvuna og fór að skrifa uppskriftir, big surprise.
Það voru ekki til plein núðlur í 10-11 (hvenær er eitthvað til í 10-11?) svo að ég keypti bara tvo pakka af súpunúðlum (bragðið skiptir ekki höfuðmáli þar sem ég notaði ekki kryddið úr pökkunum en þetta voru víst sveppa- og kjúklinganúðlur). Ég á wokpönnu, tvær meira að segja, en það er svosem hægt að komast af án hennar. Samt næst nú betri árangur við veltisteikingu ef maður er með wokpönnu og kraftmikla gashellu því málið er að ná upp háum hita í botninn á pönnunni.
Veltisteiking, já. Ég held að ég hafi smíðað það orð á sínum tíma sem þýðingu á stir-fry af því að ég var ekki sátt við aðrar tillögur sem ég hafði heyrt, síst af öllu ,,steiking að austurlenskum hætti", sem var notuð í Matreiðslubók Iðunnar á sínum tíma. Það er að segja, ég veit að ég bjó orðið til en það getur vel verið að einhver annar hafi gert það á undan. Mér finnst þetta fínt orð og nota það alltaf. Ég veit svosem ekki hvort aðrir gera það en ég hef á tilfinningunni að fólk skilji það strax þótt það hafi ekki heyrt það áður, allavega ef það þekkir aðferðina og kannast við heitið ,,stir-fry". Kannski hef ég kolrangt fyrir mér en það hefur allavega aldrei nokkur maður spurt mig hvað orðið þýði þótt ég hafi notað það í fjölda uppskrifta. Öfugt við ýmis önnur íslensk og erlend heiti og hugtök sem ég hef verið að nota.
Veltisteiktur kjúklingur með núðlum
2 kjúklingabringur, fremur stórar
2 pakkar núðlur, sleppa kryddinu
50 g kasjúhnetur
2 msk olía
2 hvítlauksgeirar, saxaðir
2 cm bútur af engifer, saxaður
3 vorlaukar, saxaðir
2 msk sojasósa
2 msk ostrusósa
1 msk austurlensk fiskisósa
1/2 lítið jöklasalatshöfuð, saxað
Kjúklingabringurnar skornar í þunnar, litlar sneiðar, gjarna á ská. Núðlurnar settar í skál, vatn hitað að suðu, hellt yfir og látið standa á meðan maturinn er eldaður. Wokpanna eða venjuleg panna hituð og kasjúhneturnar ristaðar þar til þær fara að taka lit en ekki látnar brenna. Hellt á disk. Olíunni hellt á pönnuna og hún hituð og síðan er hvítlaukur og engifer steiktur við háan hita í 20-30 sekúndur en ekki látinn brenna, Tekinn upp með gataspaða og settur á diskinn hjá hnetunum. Kjúklingabitarnir settir á pönnuna (best að setja ekki alla í einu, heldur bæta þeim á pönnuna smám saman) og steiktir við háan hita þar til hvergi sést lengur í bleikt; hrært nærri stöðugt á meðan. Hvíta og ljósgræna hlutanum af vorlauknum bætt á pönnuna og síðan sojasósu, ostrusósu og fiskisósu. Kasjúhnetur, hvítlaukur og engifer sett aftur á pönnuna og látið sjóða í 2-3 mínútur, eða þar til kjúklingurinn er eldaður í gegn. Salatinu hrært saman við ásamt afganginum af vorlauknum. Núðlunum hellt í sigti og látið renna vel af þeim og síðan hvolft á pönnuna og blandað vel. Smakkað og e.t.v. bætt við meiri sojasósu.
